Ana Sa Ran Farashin Fetur Zai Sauka Nan da ’Yan Kwanaki-IPMAN

 

Albishir ga ’yan Najeriya! Ƙungiyar masu gidajen mai masu zaman kansu ta Najeriya, wato IPMAN, ta ce akwai yiwuwar farashin fetur ya ragu nan da ’yan kwanaki masu zuwa.

Wannan labari ya zo ne a lokacin da tashin farashin fetur ya ƙara jefa jama’a cikin wahala, musamman masu ababen hawa da kuma ’yan kasuwa. Tashin farashin man fetur na da tasiri sosai wajen ƙara kuɗin mota da kuma tsadar kayan masarufi.

A cewar ƙungiyar IPMAN, ana sa ran samun sauyi a farashin fetur sakamakon yadda sabbin kayan fetur za su shiga kasuwa. Idan abubuwa suka tafi yadda ake tsammani, masu gidajen mai za su iya sauke farashin da suke sayar da fetur.

Sai dai har yanzu ba a bayyana ainihin sabon farashin da za a sayar da fetur ba, haka kuma ba a tabbatar da takamaiman ranar da za a fara rage farashin ba.

A ’yan kwanakin baya, farashin fetur ya ƙaru sosai a wasu wuraren Najeriya, lamarin da ya sa kuɗin sufuri suka tashi. Hakan kuma ya ƙara tsadar rayuwa ga talakawa, domin idan kuɗin sufuri ya tashi, farashin kayan abinci da sauran kayayyaki kan ƙaru.

Duk da wannan sanarwa da IPMAN ta yi, mutane na ci gaba da jiran ganin sauyin a zahiri a gidajen mai.

Babbar tambayar da jama’a ke yi yanzu ita ce: Yaushe za a fara ganin ragin farashin fetur, kuma zuwa nawa za a sauke shi?

Idan farashin fetur ya sauko kamar yadda IPMAN ta bayyana, hakan na iya kawo sauƙi ga ’yan Najeriya, musamman ta fuskar kuɗin mota da kuma wasu daga cikin tsadar rayuwar da ake fama da ita.

Mu dai jira mu gani! Kana ganin farashin fetur zai sauka kuwa? Kuma zuwa nawa kake ganin ya kamata a sayar da litar fetur? Ka faɗi ra’ayinka a sashin sharhi.